Müsavat Partiyası başqanlığına sabiq namizəd Qubad İbadoğlu partiya rəhbərliyinin cəza tədbirləri ilə əlaqədar praktiki olaraq hansı addımların atılacağından danışıb. 

Q.İbadoğlu “Qafqazinfo”ya açıqlamasında bildirib ki, İşçi qrupla bağlı müzakirələr davam edir: “Hələlik yekun qərar yoxdur. Fraksiyanın yaradılması müzakirə edilir. İşçi Qrupun növbəti iclası noyabrın 22-də keçiriləcək”.

Q.İbadoğlu Hikmət Hacızadənin partiyadan istefasına münasibət bildirib: “Müsavatın ən dözümlü, emosional, sadə və rasional üzvü, 60 illik şərəfli ömrünün təntənəsi hələ də davam edən, ömrünün yarısından çoxunu demokratiya, azad və müxtəlif fikirlilik uğrunda mübarizəyə sərf edən, böyük və pozitiv şəxsiyyət Hikmət Hacızadə də partiyamızla zarafatla deyil, ciddi şəkildə vidalaşdı. 

Hikmət bəy Müsavatda başlayan represiyaları dayandırmağa cəhd etsə də özü onun ən böyük qurbanı oldu. İtirən Müsavat oldu. Bu çox ağır itkidir. Hələ zaman-zaman bu itkinin ağrısını yaşayanda onun miqyasını dərk edəcəyik və onda Hikmət bəyin yerini də görəcəyik. Hikmət bəy çox nadir şəxsiyyətdir, xoşbəxtlikdən də o Müsavatın payına düşmüşdü. Müsavatı onsuz təsəvvür etmək bizlərə və sayı on minlərlə olan fədəkar və sədaqətli Müsavatçılara çətin olsa da əminik ki, o harda olmasından asılı olmayaraq demokratiya, Azərbaycan amalı uğrunda mübarizəsini davam etdirəcək.

Hikmət bəyin partiyada daxilində başladığı mübarizənin əhəmiyyətini başa düşən və dəyərini verən müsavatçılar onun partiyadakı xəttini davam etdirəcək, tezliklə partiyamızda ədalət bərpa olunacaq, represiyalara son qoyulacaq. Heç kim dediyi sözə, ifadə etdiyi fikrə görə cəzalanmayacaq. Yetər bəylər və xanımlar, nəticə çıxarın, sonra gec olacaq, ən azı növbəti dəyərlərimizi itirməmək üçün qisasçılıq və intiqam hissindən kənar soyuq başla qərarlar verin və elə mühit yaradın ki, partiya əvvəlki axarı ilə yoluna davam etsin. Unutmayın ki. bu yol yalnız partiyadaxili demokratiyadan, birlik və həmrəylikdən keçir”.

Teleqraf.az