Sumqayıt Dövlət Universitetində yeni fəaliyyətə başlayan Ritorika Universal Klubu yarandığı ilk həftədən etibarən daim diqqət mərkəzində olmağı başarıb. Xatırladaq ki, klub tam fəaliyyət başlayıb və hər həftə tələbələri maraqlandıracaq yeni mövzularla bağlı tədbir və seminarlar təşkil edir. Bu həftə isə Ritorika Universal Klubunun maraqla gözlənilən yeni layihəsi "SDU I Qladiator Debatları Kolizeyi" layihəsinin tanıtımı və ilk təlimləri olub.

 Xatırladaq ki, layihənin təlimçisi gənclər sektorunda 7 illik iş təcrübəsi ilə Şərqin ilk  Debat Formatı "Qladiator Debatları"nın konstruktoru olan Həbib Heydərdir.  Təlimçi SDU-nun 60-a qədər tələbəsinin iştirak etdiyi ilk təlimdə tələbələrə debat nəzəriyyəsi, onu praktik həyatda tətbiq sahələri, gənclərin şəxsi inkişafında debatda qazanılan bacarıqların əhəmiyyəti, eləcə də debat mədəniyyətinin qayda və prinsipləri, layihənin əsasını təşkil edən Qladiator Debatları ilə digər debat formatlarının müqayisəli təhlilini vermişdir.
Təlimlər bitdikdən sonra dekabr ayında SDU tarixində ilk dəfə olaraq tələbələrarası debat çempionatı təşkil ediləcək. Turnir gənclərin natiqlik, ritorika, araşdırmaçılıq, kritik düşüncə, komanda işi və bu kimi vacib keyfiyyətlərinin praktik olaraq təkmilləşdirilməsinə və universitetdə tələbə aktivliyini daha da qabartmağa istiqamətlənmişdir.

Qeyd edək ki, "SDU I Qladiator Debatları Kolizeyi" layihəsi Sumqayıt Dövlət Universitetinin rəhbərliyi ilə yanaşı SDU Tələbə-Həmkarlar Təşkilatı,  Sumqayıt şəhər Gənclər və İdman Baş İdarəsi, “BestFriends” Təhsil və Karyera Mərkəzi kimi qurum və təşkilatlar tərəfindən dəstəklənir və maliyyələşdirilir./Teleqraf.az/

Samir Aslan